‘A chitarra sulitaria

Spero di riuscire, con questa poesia, a contribuire a non far dimenticare un mito della musica italiana e credo mondiale...Pino Daniele


‘A chitarra sulitaria

Troppe tiempo è già passato ‘a chell’urdema canzone
‘A chitarra sulitaria va truvanne nu padrone

Coccuruno ca ’a sunasse senza fà troppe rummore
Ma ‘a chitarra sulitaria troppa bbona è abituata
Si ‘a canzone era chiù triste o gnorsì movimentata
‘A chitarra sulitaria era sempe accarezzata.

‘A chitarra tutt’’nzieme s’è scuperta rumorosa
Comme si, quanne sunasse, nun cacciasse ‘e sette note.
Sette note ‘e nu lamiento ca chi sona nun capisce
Pure si ‘a canzone è allera, ‘a chitarra sona triste.

‘A chitarra è rassegnata, chella museca è cagnata
Pure si ‘tene ‘o padrone è rimasta sulitaria.
‘O cuncierto è già fernuto e alleria nun se ne vere
‘O silenzio d’’a chitarra ghiaccia ‘o sang’ dint’’e vvene.

Tutt’’a ggente ‘a sott’’o palco vo’ scaccià ‘sta pucundria
“Uè guagliù ma che è succiesso… ce vulesse ‘na magia”…

…‘Na chitarra aret’ a tutte cacce ‘e nnote ‘e “Terra mia”.

Fantasia

Perché credo che gli adulti di oggi, come me non cambierebbero un solo ricordo dei giochi d'infanzia...


Fantasia

Nun te se vere chiu' che fine aie fatto
quand' è ca c'aie lassato quand'è state?

eppure m'arricorde tu addo'stive
e quant' 'e chelli vvote m'aie salvate

Stiv'int''a capa mia semp'annascusa
e quand' po' serveva m'aiutavi

pecchè senza 'nu juoco che facevo?
Cu''o poco 'e fantasia s'arremeriava

Cu essa tutte cose trasformave
e chello ca nunn'era... addeventava.

'Na scopa, 'nu cavallo, 'na pezza 'nu mantello
...e chello ca era brutto po' era bello

Oggi nun trove sfizzio...troppi juochi
nun s'adda 'nventà niente e nunn'è ccose

e me piacesse 'e te fa riturnà sulo 'na vota
pe fa capi' a 'e creature 'e mo' sulo 'na cosa

jucà cu ttè è state privilegio
ca m''a fatt'apprezza pure 'e disaggie

E si pecchè...

addò 'nce steva niente tu arrivave
e tutto dint' niente trasfurmave...

...'Na stanza era nu regno... e chest' mo' che è?
...chillo ca era pezzente addeventava re

Cu 'e mmane 'o girotondo, 'na palla tutt''o munno
chello ca era quadrato...addeventave tunno.

E chesta è 'a vita

Certo che per chi, come me, è cresciuto con i cartoni di Goldrake, Mazinga e chi per loro, dove la giustizia e i buoni sentimenti vincevano sempre, è dura poi constatare che non c'era e non c'è quasi nulla di più lontano dalla realtà.
Tento di rappresentare la situazione con la poesia che segue.


E chesta è 'a vita

"Chello ca aie fatto nunn'è stato belle"
Dicette Cuscienza 'nfaccia a Strafuttenza.

"Ma che me 'mporta? Ie so' Strafuttenza
fatte 'e cuscienza overo nunne tengo".

"...Nunn' è sulo cuscienza, è per giustizia.
Dincelle a essa... e vire che ne penza".

"Uè uè, sapite comm''a penze, nun ve rispongo
e poi nun me chiammate ca 'nce stongo.

Ma ie so' 'a Giustizia e 'o fatto nunn'è bello
...tanto se sape, ie stongo cu 'a Cuscienza".

"Vabbuo' chi 'a po' fa niente, nun l'hanno vista.
Ha fatto proprie buone s'è mossa cu 'a furbizia"

'Nziem' alluccaieno Cuscienza cu Giustizia
"Lievete 'a mieze... ca nun ce azzicche!"

"Ie nun ce azzecco? Vuie che dicite? Ie song''a Furbizia
'Nzieme cu 'a Strafuttenza vaco sempe liscia.

...Si agisci cu Giustizia e cu Cuscienza
dint'a sta vita nun te salvi e 'o ssaje.

...Sentite a mme... stateve zitte vuie...
Ca dint''a vita infatti... nun ce state maje".

A Massimo Troisi

A Massimo Troisi


Cu 'a faccia sorridente e cu 'e capille ricce
Ire napulitano cu 'a faccia d''o scugnizze
Parive sempe timido e sempe in imbarazzo
Risposte sottovoce ma ce lassave 'e sasso


Battuta sempe pronta, simpatico e solare
Ire talmente grande... pareva 'e guardà 'o mare
Song' film e situazioni ca hanno cuntato tanto
Si' muorto 'a tantu tiempo... ma te sanno tutti quante


Partito da San Giorgio si gghiuto assaie luntano
Ma nunn'aie perze niente d''o viecchio napulitano
Fama e ricchezza cagnano, ma tu si' rimasto 'o stesso
Aie fatto nu sulo errore... te ne si' gghiute ambresse.

Leggere e guardà

Da quello che sento potrebbe anche succedere e spero che non avvenga mai.

Leggere e guardà

'O libro è libro
e nunn''o puo' chiammà 'e n'ata manera
è fatto 'e tanta pagine
ca iniziano e fernesceno

 e tutte quant' 'nzieme
te contano 'na storia
ca quann l''e liggiuta
te siente 'e scarfà 'o core

'O libro è libro
e nunn''o puo chiammà 'e n'ata manera

...'O pigli 'o miett''a 'pposto
se sfoglia e se manèa
'o piglie n'ata vota
t''o liegge fino a sera

Poi te ne liegge n'ato
e dopp' ancora n'ato
e nun so tutt'eguali
so' tutt'culurati

Ce stà chill'elegante
o chillo a poco prezzo
ma'o segnalibro è 'o stesso
...'a pagina cu 'a recchia

...'O libro è libro
e nunn''o puo' chiammà 'e n'ata manera

'O tiene sempe annanze
'ngopp'a 'na libreria
e 'nzieme a tutti ll'ati
te danno assaje allegria

E comme fosse triste
'na casa senza libri
cu 'e storie e cu 'e racconti
tra links e documenti...

Comme s'arreda 'a casa
senza 'na libreria?
comme se legge 'o libro
cu 'o monitor appicciato?

Pecchè chist'è l'andazzo
a leggere int' 'o web...
e poi pe sfuglià 'e pagine
'o link a internet

...'O libro è libro
e nunn''o puo chiammà 'e n'ata manera

Nu monitor o nu libro?

'a grande differenza
sta tutta quanta ccà...

'a stessa differenza...

Tra leggere... e guardà

A Totò

Ad un grande attore napoletano

A Totò


Brutto comme nun saccio che
Stuort' e cu' 'a sguessera...
Curiuso comm''a cchè

Eppure eri 'nu principe
L'ultimo d''e bizantini
'O 1930 facist' 'nu pruvino

E chi l'avesse detto
chi avesse maje penzato
ma sulo doppe muorto
si' stato assaje apprezzato

Overo ddoie perzone
Il principe De Curtis...
Toto' l'inimitabile

Certo ca nun se spiega
Si' stato mille cose...
Pueta, attore comico
principe bizantino
ma t'amme pure visto
comme a 'nu ballerino

Cu chelli mosse streveze...
parive 'nu pupazzo
int' 'a 'nu bellu film
oppure 'ngopp''o palco

eppure chillu balletto...
era cosa moderna
overo cosa 'e mo'
'a primma Break dance

Per quanta cose 'e fatto
e quanta cose 'e detto
Si' state tu 'o chiu' grande

Ma...

sempe doppe muorto
e tanti 'e chilli attore
'o ssanno tutti quanti...
scattano ' paragoni

e allora 'a napulitano
penzo 'a na sola cosa...

ca 'a vita è troppa bella...

e 'a morte 'o diciste tu...

è sulo 'na "Livella".

'A favola cchiù bella

Alla più bella favola alla quale un bambino possa credere
e alla sua prima grande delusione quando finisce.

'A favola cchiù bella
a troppa corta
ca fa invidià 'e creature
ca 'a ponn' ancora leggere

Quand'è che è accumminciata?
Quand'è ca po' è fernuta?

...'A casa int''a nuttata
Creature cu''o pigiama

Chell'emozione forte
'e chi nun vene visto

Silenzio tutt'attuorno
...è notte e nun se dorme

Se parla sottovoce
...che sfizio, che emozione

l'attesa d''e regale
Natale 'a tradizione

E poi all'urteme a tutto...
'a stanza d''o salone

'a luce sta stutata
e nun se vere bbuone...

...Lassàmmela stutata
fine a che nun se cresce

ca si verimme bbuone
a favola po' fernesce

e nuie amma sulo ammettere
ca c'amme fatte gruosse

Cu' 'a sensazione bella
calda, unica e strana

Ca tene nu sulo nomme
..."'a notte d''a Befana"

Napoli Napoli

Sono napoletano e devo ammettere che la situazione è davvero difficile a Napoli.
Ma non mi va che tutti rigirino il coltello nella piaga, trattando una città così bella e importante
come una zavorra di cui liberarsi.
Purtroppo è tutta l'Italia che è in affanno, con tanti esempi negativi che vanno da nord a sud.
Quindi due righe solo per ricordare a qualcuno di cosa si parla quando si parla di Napoli.

Napoli... Napoli
Napule d''a munnezza
Napule d''e cammurriste
Napule è malamente
A Napule fann''e scippe.

Sì, m' rivolg'a tte
ca parl'e nun dice niente
ca dice semp''o stesso
pur nun sapenn' niente.

Chelle ca nun cunusce
nunn''o può giudicà
e Napoli è tropp'assaie
per t''a putè spiegà.

Song' nomm' importanti
ca veneno 'a ccà...
ca contano a' storia
'e na grande città

chi era Di Giacomo?
Chi era Troisi...
Scarpetta, Eduardo
e chi sà chi me scordo

A ecco, Caruso...
Caruso 'o tenore
Totò e Sofia Loren
e me fermo cu' llore

P''a storia t'accenno
sultanto a Sant'Elmo
Cu' Pagano e Caracciolo
e tanti ati 'e 'llore

Chi sarrà chesta gente?
Ca nisciuno chiù sape
Song''e martiri d''a costituzione
e di 'na Napoli capitale

Capitale ca era
e ca mo' nunn'è cchiù
'e "briganti" d'aiere
nun ce stanno cchiù

Ma tu che ne saie
a te che t''mporta
per te chesta Napule,
sarrà sempe munnezza.

Ma sì, parla parla
tu ca ca saie tutto...

...pure d''o golfo 'e Napule
Dicisse che è brutto

Dille pure 'e bucìe...
Che è tutt' munnezza

Te voglie sulo dicere
ca chi disprezza accatta
Ca Napule è troppe...
e ca l'invidia schiatta.

'A meglia strada

Credo che in molti se lo chiedano

'A meglia strada

Meglio a essere sicchione?
o a gghì a ghiucà a pallone?
Qual è 'a risposta bbona
si uno m''o chiedesse?

Chi è che è chillo bbuone?
...E chi rummane fesso?
Verimmo 'e ce risponnere
facenn''e differenze...

Si' sturie si signore...
...te chiammano duttore
Fatichi e 'n tiene niente
o meglio c''a faie a stiento...

Diversa è 'a situazione
'e chi joca a pallone
oppure meglio ancora...
sceglie 'a televisione...

'E femmene 'e denari...
si' sempe nu guaglione...

...e allora che ce dico?

...marò che confusione!

Nu suonno

Credo che a volte sembri proprio così

Nu suonno

Nu suonne luong' assaie
addò nuie cumbattimme
per rimanè addurmute
e nun ce scetà maie.

Addò facimme 'e cose
ca s'erano penzate
ca 'a piccerilli a gruosse
avevemo sturiato.

Addò 'e difficoltà
se superano 'e slancio
cu ll'ottimismo 'a grinta
'a forza e l'entusiasmo.

Addò tutt'è cchiù semplice
magari sì difficile
ma no proprie impossibile.

Nu bellu suonne insomma
ca se chiammase vita
addò nun s'adda chiagnere
per essere felice.

E allora finché è possibile
facimmece unu suonne...

quant' chiù bell' vene...
Tanto poi 'o tiempo passa
arriva...

e poi ce sceta.

O prezzo d''a cuscienza

 Perché davvero mi scandalizzo a vedere vite spezzate dal crollo di case a cui si ha diritto.

O prezzo d''a cuscienza


Sorde... ca servono per tutto
... ca fann' arapì 'e porte
ca pavano tutt' cose...
e fanno sentì apposto

Ca lavano 'e cuscienze
'e chi nun pava maje
e cchiù so grosse 'e colpe
e cchiù se pave assaje

e tutto ave nu prezzo.
l'orgoglio d''e perzone
'e llacreme d''a ggente
ca accetta 'e sorde spuorche
pecché nun tene niente

'A gente ca nun pave
ca parla e poi s'indigna
commemora e po' pave
... ma nun se scandalizza

Pecché se sape primma
chell' che pò succedere
ma è meglie a risarcì
invece 'e prevenì

Song''e centro sinistra?
Poi song''e centro destra
'a storia è sempe 'a stessa
'a solita menesta

'e muorti nun se pavano
'e chesto ca m''ncazz'
ma ai voglia a ghittà lacreme
ccà sarrà sempe 'o stesso

Gente ca pave sang'
nu prezzo che è troppe gruosse
e pure si è accussì aveto
ce starrà sempe 'o riesto.

Sorde overi e sorde apposta

Non è vero che ci sentivamo più ricchi?

Sorde overi e sorde apposta
Euro 'e carta
Euro 'e muneta
Euro forte e zona euro

...ma che so' tutte sti' ccose?

so' parole complicate
ca 'nce fanno truvà pace.

alla fine è na muneta
ca nun ce dà tanto sfizzio
ce 'a suramme 'a guaragnamme
ma ce pare comme finta.

primma 'a lira era cchiù bella
pure si nunn'a tenive
ce sentevemo cchiù ricchi
pure cu' na mille lire.

certo è strana 'a sensazione
ogni piezzo vale 'o ddoppio
ma ce faie 'a mmità d''e ccose
...quann' arrive 'a fine 'o mese
sta sicuro nun te truove.

pure stann' senza sorde
era meglio primma 'e ll'euro
pecché tanno, 'o cchiù pezzente
s'esprimeva meglie ancora.

Quann' dice " 'n teng' n'euro"
nun ce sona tantu bbuone
nunn' è meglie e chiù carino
dire "sto senza 'na lira?"

'O posto

Due righe per restare nella drammatica attualità di oggi.

'O posto



"Aggie pigliate 'o posto"
chi è ca 'o po' chiú dicere?
Gnorsì na frase fatta...
significava crescere...

significava spennere
senza ce penzà tropp'
e fa quadrà 'o bilancio
cu nu lavoro onesto

Ce steva nu contratto
ce steva 'a prestazione
ce stevano 'e salarie
e doppo 'na penzione

Si primma era difficile
mo stamme a 'o paradosso
cu' uno o dduie contratti
e sempe a capa 'a sotto

Tenimme chiú 'e trent'anni
ma sempe 'a cameretta
e tutta 'a vita nosta...
rimane nu progetto

Famiglia...'na chimera
'a machina nu suonno
e pe' truvà lavoro
amma pavà nuie a llore

'O chiammano flessibile
ma è nu sistema 'ngrato
po' 'o chiammano a progetto...

...ma è sulo precariato.

Quand' criscenno

Al tempo che passa e alle sensazioni che ne derivano

Quand' criscenno
Quand' criscenno te capita 'e pruvà
sti sensazioni

per dicere 'e mondiali
magari 'a cchiu' 'e diec'anni
so' passati...
e t'arricuordi pure chi a signate

Quand' 'e sorde ca papà e mammà te danno
nun song' regalate nossignore
ma song' sulamente anticipate

Quand' nun song' sempe spuorchi e stropicciati
ma song 'e bancomat frischi e stirati

Quand' cazune, scarpe e maglie
nun song' 'e genitori a l'accattà
e pe c''e ffà vedè tu li 'a chiammà

Quand' cu 'e frati tuoie
te vire duie tre vote dint' 'a n'anno
pecchè tra impegni vari
tutt''e duie jate fuienno

Quand' criscenno ancora
parlann' tra parienti e amice
cose 'e vint' ann' fa te pareno tre mise

Può sta sicuro ca è passate 'o tiempo
e tu t''e fatte gruosse

e sta cunferma t''a da chell'emozione
passanno annanz''o specchio d''o salone
...tu figlie masculo te guarde...
...e vire a pateto guaglione

Uommeni creature

A volte bambini troppo piccoli, per quanto bravi e preparati, a mio modesto parere non dovrebbero apparire in televisione tanto presto.

Uommeni creature
Song' uommeni?
Song' creature?
là per là me pareno uommeni
però 'o saccio ca song' creature

'E chiammamm' bambini prodigio...

'Ngopp' 'o palco, int''a televisione
mentre sonano, cantano e abballano
ma chi 'o ssape si se divertono
sti creature ca pareno uommeni

Certo uommeni in miniatura
ma so' sempe comunque creature
'a domanda ca sento 'e me fa
"stann buone la 'ngoppa a cantà?"

Mentre cantano, ballano, parlano
saparranno che stanno facenno?
E' l'inizio 'e na grande carriera
ma per loro stanno sempe pazzianno

Ed allora pazziate creature
ca per crescere 'o tiempo ce stà
e si primma faciveve 'e gruosse...
'e creature nunn 'e putite cchiu' fà.

Amici

A tutti gli amici... che mancano.

Amici

Agli amice... ca quand' song' overe song' pochi
chill' ca si t'appiccechi poi doppo te perdonano.

Chill' ca pass''o tiempo e poi te chiammano
ca quand' nun ce staie llore te penzano.

Chill' ca si te giudicano almeno te capisceno
e quand' parl' a vanvera s'incazzeno e supporteno.

Ca quand' te ne vai llore te mancano
pecchè gli amice favezi magari nun te capisceno.

E allora addò staje staje tu pienz' a llore
capenn'ca gli amice overe stann' altrove.

Na cosa rara

Credo che quando, dopo tante ricerche ed esperienze non tutte piacevoli,
si riesca a trovare l'amore, si possa dire qualcosa del genere.

Na cosa rara

E t'aggia cunfessà na cosa...
me metto na paura 'e nun te riconoscere
overo forte assaie.

Sì pecchè n'aggie pruvate tante 'e sensazioni
...ma l'ammore overo penze maie.

Na vota era l'affetto
...e 'o chiammaie ammore

Na vota era passione
...e 'a chiammaie ammore

Magari era amicizia
e pure 'a chiammaie ammore

Ma ammore vero nunn'è stato maie
...e si foss' arrivato e nunn''o riconoscesse?

E allora na cosa sola

Si overo sì arrivato
nun te vulesse perdere
perciò rummane ccà
...e fatt' riconoscere.

Comme t'aggia chiammà?

Un omaggio alla paura, questa cosa che si prova tutti i giorni, ma che non si riesce a definire.
Non ultima la paura degli abruzzesi per il terremoto, o quando arriva sottoforma di pensieri, sensazioni... questa cosa che si prova, ma che non si puo evitare.
Quindi si va avanti e ci si convive.

Comme t'aggia chiammà?
Chi sì?
Nun te veco ma te saccio...

Te saccio 'a piccerillo
dint'a na stanza buia,
quanno restavo sulo...
Maronna che...

No nun te nommeno
te voglie definì
e si pure nun ce riesco,
cerco 'e me fa capì.

Guaglione nunn 'a cunusce,
te sta sempe vicino
ma nunn 'a vire maie,
cerca 'e t'attanaglià...
ma nun t'acchiappa maie.

Po' crisce e te faie omme
... 'a tiene pe nu figlio.

Quanno t''e fatte viecchie
nun saie manco che è
o meglio, chiù forte 'a siente
chiù 'a tiene 'ncuorp'a tte.

Te vene per ogni cosa
...mò tene na raggione
mo è sulo nu pensiero,
ma 'a quann' simm' nati
nun ce fa stà mai quieti.

Paura...

Sulo mò ca so' viecchie,
guardannola faccia a faccia,
'a saccio overamente,
mò c'aggie fatto tutto...

...sentennola, tremmanne
ma faccio finta 'e niente.

'A ricchezza d''e parole

Trovo che il dialetto dia maggiore forza al messaggio che si vuole mandare... per questo preferisco scrivere in napoletano.

'A ricchezza d''e parole

Comme 'a na cosa "nosta" 'a che nascimmo,
comme 'a nu stemma 'ngoppa 'o core
ca ce fa arricurdà, quann' è passato 'o tiempo
addò venimmo.

N'addore ca te puorte 'nguolle...
ca nun se perde maje, pure si parte
e vaje luntano... addò vaje vaje.

Na cicatrice doce...
ca è vvote nun se vede, ma ce sta,
'e vvote 'a nascunimmo ma sta llà...

Addò se vene vene è sempe doce sta ferita...
e nun sia maje 'a guaressemo,
restassemo feriti tutt' 'a vita.

'O ssann' tutt' quante,
se parla mmieze 'a via
te fa sfugà l'arraggie
e 'o tuosseco 'e na vita.
Cu isso riesce a dicere,
chell' ca nun se sturia...
ma ca t'abbrucia forte dint' 'o pietto...

...chell' ca detto in italiano
nun fa effetto...

è chesta 'a cosa bella...
'a forza d' 'o dialetto!

Terra ferita

Beh... stando all'estero non poteva mancare una poesia sulla nostra cara Italia.
Certo che è strana la situazione di questa terra: tanta cultura, paesaggi splendidi eppure
non si riesce ad uscire dal tunnel... Meno male che la speranza è l'ultima a morire.


Terra ferita


Tene 'a forma 'e na scarpa...
na scarpa che vale,
è pure na scarpa 'e lusso
...è nu stivale

Avessa cammenà...
e certo 'a cammenato,
ma mò so' cchiù 'e trent'anni
ca nun cammina cchiù... ca s'è fermata

è caruta p''a munnezza
dint''e spari 'e na pistola
sta ammiscata int''e precarie
e c''o PIL ca va in malora

Sent' chiacchiere a muntune
ma nisciuno ca l'aiuta...
tanta gente pur piangendo...
è partuta e se n'è gghjuta

Nuje ca all'estero vedimmo
chesta Italia fatta male
ca se storce e nun c''a fa
alluccamme ca ce manca...
ca vulessemo turnà.

Si pecché nuje 'a criticamme
ne parlamm' e ce 'ncazzamme
ma 'a vulimmo accussi' bene
ca 'a vulimmo perdonà...

ed allora un solo grido
"si vabbuone t''e fermata...
ma mo' tuorne a cammenà"